मनोज जरांगेंनी शाहू महाराजांचा मान राखला

जालना : राज्यात मराठा आरक्षणाचा मुद्दा तापला आहे. जालन्यातील आंतरवाली सराटी  येथे मराठा आंदोलक मनोज जरांगे पाटील आमरण उपोषणाला बसले आहेत. राज्यभरात मराठा आरक्षण आंदोलनाला हिंसक वळण लागलेलं आहे. अशातच आज (मंगळवार, 31 ऑक्टोबर 2023) कोल्हापूरचे श्रीमंत शाहू महाराज यांनी  आंतरवाली सराटीत उपोषणस्थळी जाऊन मनोज जरांगेंची भेट घेतली. त्यावेळी शाहू महाराजांना शब्द देत, राजांचा मान राखून दोन दिवस पाणी पिणार, दोन दिवसांत आरक्षण मिळालं नाहीतर पुन्हा पाणी सोडणार, असं म्हटलं आहे.

राज्यात मराठा आरक्षणाचा मुद्दा पेटला असताना राज्यभरातून अनेक नेते श्रीमंत शाहू महाराजांनी आंतरवली सराटी येथे जाऊन मनोज जरांगे-पाटील यांची भेट घेतली. छत्रपती घराण्यातील माजी खासदार संभाजी राजे छत्रपती यांनी भेट घेतल्यानंतर आज कोल्हापूरचे श्रीमंत शाहू महाराज मनोज जरांगे-पाटील यांची भेट घेतली. त्यावेळी शाहू महाराजांनी सरकारला आपला शब्द ऐकावाच लागेल, असं स्पष्टच सांगितलं. तसेच, तब्येतीची काळजी घेण्याची विनंती मनोज जरांगेंना शाहू महाराजांनी केली.

दरम्यान, संभाजीराजे छत्रपतींनी मराठा आंदोलक मनोज जरांगेंशी फोनवरुन चर्चा केली. तसेच, जरांगेंच्या तब्ब्येतीची संभाजीराजेंनी चौकशीही केली. मनोज जरांगेंना निदान पाणी तरी घ्यावं अशी विनंतीही संभाजीराजे छत्रपतींनी केली. तसेच, काळजी घेण्याचंही आवाहन संभाजीराजेंनी केलं. यापूर्वी आंतरवाली सराटीत जात संभाजीराजे छत्रपती यांनी मनोज जरांगेंची भेट घेतली होती.