आदितींविरोधात ६ आमदार एकवटले, तटकरेंविरोधात शिंदेसेनेने मोर्चा उघडला, वादाची ठिणगी पडली!
मुंबई : राष्ट्रवादी काँग्रेस पक्षाचे नेते अजित पवारांसह आठ मंत्र्यांच्या मंत्रिमंडळ समावेशामुळे मुख्यमंत्री एकनाथ शिंदे समर्थक आमदारांमधील अस्वस्थता टोकाला पोहोचली आहे. मंत्रिमंडळाच्या प्रस्तावित विस्तारामध्ये आपल्याला मंत्रिपद मिळालंच पाहिजे, यासाठी शिंदेंच्या आमदारांमध्ये चढाओढ आहे. याच संघर्षातून दोन आमदारांमध्ये झटापटी झाल्याचं वृत्त ताजं असतानाच शिवसेना शिंदे गट आणि राष्ट्रवादीत वादाची पहिली ठिणगी पडली आहे. त्याला कारण ठरल्या आहेत-राष्ट्रवादीच्या नवनियुक्त मंत्री आदिती तटकरे…!
शरद पवार यांनी महाविकासचा प्रयोग केला. शिवसेनेचे पक्षप्रमुख उद्धव ठाकरे यांनी मुख्यमंत्रिपदाची जबाबदारी पेलली. त्यांच्या मंत्रिमंडळात राष्ट्रवादीचे ज्येष्ठ नेते सुनील तटकरे यांच्या कन्या आदिती तटकरे यांची थेट कॅबिनेट मंत्रिपदी वर्णी लागली. तसेच रायगड जिल्ह्याच्या पालकमंत्रिपदाची जबाबदारी देखील त्यांना देण्यात आली. आताही अजितदादांच्या बंडानंतर तटकरेंनी त्यांना साथ दिल्याने अजितदादांनी आदिती तटकरेंना पुन्हा कॅबिनेट मंत्रिपदाची संधी दिली. इकडे आपला समावेश मंत्रिमंडळात होईल या आशेने शिंदेंच्या आमदारांची मात्र यामुळे गोची झालीये. आदिती कानामागून आल्या आणि तिखट झाल्या, अशा भावना शिंदेंच्या साथीदारांच्या आहेत. याचमुळे आदिती तटकरेंच्या मंत्रिपदास सेना आमदार भरत गोगावले यांनी कडाडून विरोध केलाय.
आधीच्या सरकारमध्ये ज्या काही घडामोडी घडल्या होत्या, त्यावरुन आदिती तटकरे यांच्या पालकमंत्रिपदास जिल्ह्यातील ६ आमदारांचा विरोध आहे. तसेच सरकार बनविताना मुख्यमंत्री-उपमुख्यमंत्र्यांमध्ये काही गोष्टी ठरल्या होत्या. यात रायगडच्या पालकमंत्रिपदाबाबत देखील गणित ठरलेलं होतं. ज्यावेळी माझा नंबर होता, पण मला थांबवलं गेलं. त्याचवेळेस रायगडचं पालकमंत्रिपद शिंदेंच्या शिवसेनेकडेच राहिल, असं सूत्र त्यावेळी ठरलं होतं. त्यावेळी तर दोनच पक्षांचं आमचं सरकार होतं.
पालकमंत्रिपद आम्हालाच मिळावं, आदिती तटकरेंना आमचा विरोध
भाजपकडे पालकमंत्रिपद जाऊ नये, यासाठी आम्ही आधीच पालकमंत्रिपदाचा विषय मार्गी लावलेला होता. मग आता तिसऱ्या पक्षाची एन्ट्री झालेली असताना रायगडचं पालकमंत्रिपद त्यांच्याकडे जावं हा प्रश्न येतोच कुठे? ठरल्यानुसार रायगडचं पालकमंत्रिपद आम्हालाच मिळावं, ही आमची मागणी आहे, असं भरत गोगावले म्हणाले.
अजित पवारांच्या एन्ट्रीने शिंदे सेनेच्या आमदारांमध्ये खदखद
अजित पवार यांच्यासह ८ मंत्र्यांचा शपथविधी झाल्यानंतर भरत गोगावले यांनी काहीशी नाराजी दर्शवली होती. सत्तेच्या वाटपात आता तिसऱ्या पक्षाची एन्ट्री झाल्याने वास्तव परिस्थिती स्वीकारावी लागेल, अशी तडजोडीची भाषा करतानाच काहीशी नाराजी त्यांनी बोलून दाखवली होती. नाराज होऊन काय करता-सत्य परिस्थिती स्वीकारावी लागेल ना… अशी अगतिकता त्यांनी व्यक्त केली होती.
