परभणी : राज्यातील परिवहन विभागाच्या बसेसची अवस्था अत्यंत दयनीय झाली आहे. मागील काही दिवसांपासून एसटी बसची दूरवस्था दाखवणारे अनेक व्हिडीओ सोशल मीडियावर सतत व्हायरल होत आहेत. कधी या बस अचानक बंद पडत आहेत तर, कधी बसचं पूर्ण छप्परच उडत असल्याचे प्रकार समोर आले आहेत. परभणीत तर चक्क धावत्या बसचे चाकच निखळल्याची धक्कादायक घटना घडली आहे.
परभणीच्या गंगाखेड-पालम राष्ट्रीय महामार्गावर घटना घडल्याची माहिती समोर आली आहे. प्रवाशांनी भरलेल्या भरधाव वेगात असलेल्या बसचं चाक निखळलं आणि १०० फूट लांब जाऊन पडलं. सुदैवाने बसमधून प्रवास करणा-या ६२ प्रवाशांचा जीव वाचला आहे. पण नक्की काय घडलं हे जाणून घ्या.
गंगाखेड आगाराची बस गंगाखेड हुन पालम कडे ६२ प्रवासी घेऊन निघाली होते..गंगाखेड-पालम राष्ट्रीय महामार्गावरील केरवाडी जवळ धावत्या बसचे चाक निखळले..तरीही बस धावत होती.ही बाब याच रस्त्यावरून जात असलेल्या पीक अप चालक भागवत मुंडे यांना दिसली त्यांनी तात्काळ बस चालकाला हातवारे करून आवाज करून लक्षात आणून दिले तेव्हा बसचालक यांनी ही बस थांबवली…महत्वाचे म्हणजे या बसचा वेग जास्त असल्याने टायर चक्क १०० फुटांपर्यंत जाऊन पडले..सुदैवाने पीक अप चालक भागवत मुंडे यांनी ही गंभीर बाब लक्षात घेऊन बस चालकाच्या लक्षात आणून दिल्याने पुढील अनर्थ टळला.
एसटी महामंडळाच्या अनेक बस भंगार झाल्या आहेत. मात्र तरीही त्या रस्त्यांवर धावताना पाहायला मिळत आहेत. काही दिवसांपूर्वी गडचिरोलीमधील लालपरीचा एक व्हिडीओ सध्या तुफान व्हायरल होत आहे. या व्हिडीओमधील एसटीचा पत्रा हा हवेत उडाला आहे. तरी या एसटीचा चालक ही बस भरधाव वेगाने चालवत आहे.
