कात्रज कोंढवा रस्त्यावर ११ वाहनांचा भीषण अपघात

पुणे : पुण्यातील कात्रज कोंढवा रस्त्यावर तब्बल ११ वाहनांचा विचित्र अपघात झाला आहे. यामध्ये एका नागरिकाचा मृत्यू झाला असून ५ जण गंभीर जखमी झाल्याची माहिती समोर आली आहे. या अपघातामध्ये स्कूलबस, दुचाकी आणि ट्रकचाही सामावेश असल्याची धक्कादायक माहिती आहे.

दरम्यान, कोंढवा बुद्रुक स्मशानभूमी जवळ हा विचित्र अपघात झाला. शाळेत जाणा-या विद्यार्थ्यांच्या स्कूल बसला ट्रकने जोराची धडक दिली. पण सुदैवाने या अपघातात शाळकरी मुले बचावली आहेत. यातील दोन विद्यार्थी किरकोळ जखमी झाले असून त्यांना उपचारासाठी हॉस्पिटलमध्ये दाखल करण्यात आले आहे. अपघातानंतर कोंढवा पोलिस घटनास्थळी दाखल झाले आहेत.

अपघातामध्ये १ नागरिकाचा मृत्यू झाला असून पाच जण गंभीर जखमी झाले आहेत. अपघातानंतर काही काळ वाहतूक कोंडी झाली होती. पण पोलिसांनी काही वेळातच वाहतूक कोंडी सुरळीत केली.