लाचखोर पीएसआयचा सिनेस्टाईल पाठलाग; पळता पळता लाचेची रक्कम फेकली; कारमध्ये सापडलं घबाड
जालना : लाचलुचपत विभागाच्या सापळ्याचा संशय येताच धूम ठोकणाऱ्या पोलिस उपनिरीक्षकाला एसीबीच्या पथकाने सिनेस्टाईल पाठलाग करून ताब्यात घेतले. पळून जाताना लाचेची रक्कम फौजदाराने अक्षरशः फेकून दिल्याचे समोर आले. त्याचवेळी त्याच्या कारमधील ९ लाख ४१ हजार ५९० रुपयांची रोकड, तब्बल २५ तोळे सोने असे मोठे घबाड पथकाच्या हाती लागले. ही कारवाई काल बुधवारी जालना शहरात करण्यात आली.
गणेश शेषराव शिंदे असे लाच स्वीकारणाऱ्या पोलिस उपनिरीक्षकाचे नाव आहे. जालना शहरातील कदीम पोलिस ठाण्यात दाखल गुन्ह्यात तक्रारदाराला अटकपूर्व जामीन मिळाला आहे. या प्रकरणात तक्रारदारावर ११० ऐवजी १०७ प्रमाणे प्रतिबंधक कारवाई करण्यासाठी व गुन्ह्यात मदत करण्यासाठी फौजदार गणेश शिंदे याने १ लाख रुपये लाचेची मागणी केल्याने तक्रारदाराने छत्रपती संभाजीनगर येथील लाचलुचपत प्रतिबंधक विभागाकडे (एसीबी) तक्रार दाखल केली. या तक्रारीच्या अनुषंगाने पथकाने काल बुधवारी जालना येथील कदीम पोलिस ठाण्याच्या आवारात सापळा लावला.
कारच्या तपासणीत ९ लाख ४१ हजार ५९० रुपयांची रोकड व तब्बल २५ तोळे सोने सापडले. संबंधित मुद्देमाल लाचलुचपत पथकाने जप्त केला आहे. या प्रकरणी रात्री उशिरापर्यंत कदीम पोलिस ठाण्यात गुन्हा दाखल करण्याची प्रक्रिया सुरू होती.
