खंडणी मागितल्यास ‘मकोका’ लागणार

बीड: ‘बीड जिल्ह्याचे पालकमंत्री व उपमुख्यमंत्री अजित पवार बीड जिल्ह्याच्या दौऱ्यावर आले होते. बीडमध्ये दाखल झाल्यानंतर अजित पवार यांनी राष्ट्रवादी काँग्रेस कार्यकर्त्यांशी संवाद साधला. गेल्या दीड महिन्यांपासून बीड जिल्हा संतोष देशमुख हत्या प्रकरणी चर्चेत आहे. अशातच पालकमंत्री म्हणून नियुक्ती झाल्यानंतर अजित पवारांनी आपल्या बीडच्या पहिल्या दौऱ्यात राष्ट्रवादी पक्षाच्या कार्यकर्त्यांचे चांगलेच कान टोचले. बीड जिल्ह्याच्या विकासकामांमध्ये आडवे येऊ नका. विकासाची कामे करताना कुणाला खंडणी मागण्याचा प्रयत्न करू नये. असे प्रकार माझ्या कानावर आल्यास महाराष्ट्र संघटित गुन्हेगारी नियंत्रण कायदा (मकोका) लावायला मी मागेपुढे बघणार नाही,’ अशा शब्दांत अजित पवारांनी पक्ष कार्यकर्त्यांना इशारा दिला.

पवार पुढे म्हणाले, ‘बीडच्या वेगवेगळ्या प्रकारच्या बातम्या सध्या वाचतो, पाहतो. त्यामध्ये जिथे तथ्य असेल, तिथे संबंधितांवर कारवाई केली जाईल. जिथे तथ्य नसेल, त्या संदर्भात कारवाई करण्याचा प्रश्न येणार नाही. इथे जिल्हाध्यक्ष आहेत, सर्व विभागांचे प्रमुख आहेत. माझी कामाची पद्धत थोडी वेगळी आहे. जी कामे मंजूर झाली ती कामे दर्जेदार असली पाहिजेत. त्यामध्ये वेडेवाकडे प्रकार झाले, तर मी सहन करणार नाही. तो राष्ट्रवादी काँग्रेसचा, जवळचा-लांबचा असे काही बघणार नाही. जनतेचा पैसा सत्कारणी लागला पाहिजे. कुठेही गडबड नको.’

अजित पवार पुढे म्हणाले, ‘मला सगळ्यांनी चांगल्या कामाला साथ दिली पाहिजे. त्यात मी अधिकारीही बघणार नाही. काही काही अधिकाऱ्यांना इथे बरीच वर्षे झाली आहेत. त्यातही मी दुरुस्ती करणार आहे. कोणत्याही कारणावरून कुणी रिव्हॉल्व्हर काढते. रिव्हॉल्वर स्वसंरक्षणासाठी आहे, हे कायम लक्षात ठेवा.’