कोल्हापूर : कोल्हापुरातील रस्त्यांची परिस्थिती सांगणं हे कोणाला नवीन नाही. कोल्हापूर शहरासह जिल्ह्यात आलेल्या प्रत्येक पर्यटक आणि नागरिक खराब रस्त्यांमुळे त्रस्त आहे. अशातच या खड्ड्यातील रस्त्यांमधून जाताना एका गर्भवती महिलेला हादरे बसून अचानक प्रसूती कळ येण्यास सुरुवात झाली आणि रस्त्यातच तिची प्रसूती झाल्याची घटना कोल्हापुरात उघडकीस आली आहे. सुदैवाने बाळाची आणि आईची तब्येत बरी असून दोघेही सुखरूप आहेत.
ही घटना निपाणी मुरगुड रोडवरील यमगे गावाजवळ घडली असून सदर कुटुंबीय मध्य प्रदेश येथून ऊस तोडणीकामगार म्हणून आले होते. खराब रस्त्यांमुळे प्रसुती काळा सुरू झाल्याने रस्त्यातच सदर महिलेने बाळाला जन्म दिला. दरम्यान रुग्णालयाजवळ नसल्याने बाळाची नाळ खुरप्याने कापावी लागली. आणि नंतर मुरगुडच्या ग्रामीण रुग्णालयात बाळ आणि बाळंतिणीला दाखल करण्यात आले.
काल रोजी सायंकाळच्या सुमारास भुदरगड तालुक्यातील तिरवडेच्या दिशेने ट्रॅक्टरमधून ही सर्व मंडळी निघाली होती. रस्ता अत्यंत खराब असल्यामुळे प्रचंड हादरे बसत होते. या हादऱ्यांमुळे किरण पालवी यांना पोटात दुखण्यास सुरुवात झाली तसेच प्रसूतीच्या कळा येऊ लागल्या. दरम्यान, महिलेला त्रास होत असल्याचे बघून ट्रॅक्टर मालक सुरज नांदेकर यांनी १०८ डायल करत रुग्णवाहिकेला कॉल केला. मात्र, खराब रस्ता असल्यामुळे रुग्णवाहिका येण्यास विलंब होत होता. दरम्यान, रुग्णवाहिका दाखल होण्यापूर्वीच रस्त्याच्या कडेला शेतामध्ये काही महिलांनी आडोसा करत सदर महिलेची प्रसूती केली.
दरम्यान, केसू पालवी यांनी एका गोंडस बाळाला जन्म दिला. यात अत्यंत भीषण अवस्था म्हणजे सुविधा नसल्याने टोळीतील लोकांना बाळाची नाळ खुरप्याने कापावी लागली. यानंतर यमगे गावातील आशा स्वयंसेविकांनी तातडीने घटनास्थळी दाखल होत महिलेला आणि बाळाला प्राथमिक उपचार केद्रांत हलवले. तर डॉ. रुपाली लोकरे, आशासेविका सरिता एकल, सुनीता पाटील, सुनीता कांबळे यांनी धाव घेऊन उपचार केले आणि त्यांना रुग्णवाहिकेतून तात्काळ मुरगूडच्या ग्रामीण रुग्णालयात नेले.
सध्या या दोघांवर इथे अधिक उपचार सुरु असून बाळ आणि आई सुरक्षित आहेत. मात्र, कोल्हापूर जिल्ह्यातील रस्ते किती भीषण परिस्थितीमध्ये आहेत हे या घटनेवरून दिसून येत आहे रस्त्यात खड्डा आहे की खड्ड्यात रस्ता हेच समजत नसून शहराच्या रस्त्यासह राज्यमार्गाचे देखील प्रचंड दुरावस्था झाली आहे.
