दारू पिऊन मित्राला नेहमीचं द्यायचा शिव्या; घरातल काम आणि मारहाणीला कंटाळून रूममेटनेच घेताला रूममेटचा जीव
पुणे : पुणे शहरात दिवसेंदिवस गुन्हेगारीचे प्रमाण वाढत आहे. कोयता गँगच्या उच्छादानंतर आता आता दिवसाढवळ्या पुण्यात खून होत आहे. अशातच पुण्यातील गुन्हेगारीला आळा घालण्याचं मोठं आव्हान पुणे पोलिसांसमोर आहे. त्यातच एका खुनाच्या प्रकारात कोंढवा पोलिसांनी एका आरोपीला अवघ्या आठ तासात बेड्या ठोकल्या आहेत.
९ जानेवारी रोजी कोंढवा पोलीस ठाण्याच्या हद्दीत कामठे पाटील नगर येथील हातीमी हिल्स सोसायटीच्या मागील निर्जन स्थळी एका इसमाच्या तोंडावर मारहाण करुन, गळा आवळून खून करुन बॉडी फेकून देण्यात आली होती. खून करणाऱ्या अज्ञात इसमाचा शोध घेऊन ताब्यात घेण्याबाबतच्या सुचना वरिष्ठ पोलीस निरीक्षक संतोष सोनवणे यांनी दिल्या होते. अज्ञात आरोपीचा शोध घेण्याकामी कोंढवा पोलीस ठाणेकडील दोन तपासपथके तात्काळ रवाना करण्यात आली होती. सहा पोलीस निरीक्षक, लेखाजी शिंदे व सहा पोलीस निरीक्षक दिनेश पाटील हे तपास पथकातील अमलदार यांच्यासह अज्ञात आरोपी यांचा शोध घेत होते.
प्रथम मयत बॉडी ही नसीम सइदुल्लाह खान (वय ३७ वर्षे, रा. लेबर कॅम्प, कामठेनगर, पुणे मुळ रा. कुशीनगर उत्तरप्रदेश) यांची असल्याची माहिती निष्पन्न केली गेली. तेव्हा सदर इसमाचा कोणाशी वाद आहे का? कोणाशी भांडणे झाली आहे का? याबाबत तपास केला असता काही उपयुक्त माहिती मिळाली नाही. त्याचप्रमाणे घटनास्थळी कोणत्याही प्रकारचे सीसीटिव्ही फुटेज, प्रत्यक्षदर्शी साक्षीदार अगर तांत्रिक पुरावा तसेच परिस्थितीजन्य पुरावा प्रथमदर्शनी मिळून न आल्याने पोलिसांसाठी आरोपीबाबत माहिती मिळवणे आव्हानात्मक झाले.
अशा प्रतिकुल परिस्थितीत सदर घटनास्थळी जवळील वस्तीमध्ये राहणारे इसमांनी त्याचा घात केला असल्याबाबत संशय बळविल्याने गोपनीय माहिती काढून कमल रोहित ध्रुव (वय १९ वर्षे, रा.लेबर कॅम्प, कामठेनगर, पुणे मुळ रा. छत्तीसगड) यास ताब्यात घेऊन त्याच्याकडे तपास केला. त्याने पहिल्यांदा उडवाउडवीची उत्तरे दिली. परंतु त्यास पोलीस खाक्या दाखवून वेळप्रसंगी भावनिक प्रश्न विचारुन चौकशी केली असता त्याने मयत नसीम सइदुल्लाह खान हा त्यास दारु पिऊन रोजच शिवीगाळ करत होता. तसेच घटनेच्या दिवशी देखील मयताने त्यास पुन्हा शिवीगाळ करुन बाहेर निघून गेला होता. तेव्हा कमल रोहित ध्रुव याने त्याच्या पाठोपाठ हातीमी हिल्स सोसायटीच्या मागील निर्जळस्थळी जाऊन प्रथम हाताने गळा आवळून व नंतर तोंडावर दगड मारुन जखमी करुन खून केल्याची कबुली दिली आहे. आरोपी व मयत टाइल्स फिटिंगचे काम करायचे.
सदरची कामगिरी मा. रितेशकुमार सो पोलीस आयुक्त, मा.रंजन शर्मा सो, अपर पोलीस आयुक्त, पूर्व प्रादेशिक विभाग, मा. आर राजा, पोलीस उप आयुक्त सो परि.०५, मा. शाहुराव साळवे, सहा. पोलीस आयुक्त, वानवडी विभाग, सतीष सोनवणे, वरिष्ठ पोलीस निरीक्षक, संदिप भोसले, पोलीस निरीक्षक (गुन्हे) याच्या मार्गदर्शन व सुचनाप्रमाणे सहा पोलीस निरीक्षक लेखाजी शिंदे, सहा. पोलीस निरीक्षक दिनेश पाटील, पो हवा. अमोल हिरवे, पो हवा विशाल मेमाणे, पो हवा लवेश शिंदे, पो हवा निलेश देसाई, पो हवा सतीश चव्हाण पो शि शाहिद शेख, पो शि संतोष बनसडे. पो.शि. जयदेव भोसले. पो.शि. विकास मरगळे यांनी केली आहे.