महाराष्ट्राच्या राजकारणात पुन्हा मोठा भूकंप होण्याची शक्यता आहे. शिवसेनेनंतर आता राष्ट्रवादीतही मोठी फूट पडणार असल्याची चर्चा असून अजित पवार हे राजभवनावर दाखल झाले आहेत. ते आपल्या विरोधीपक्षनेते पदाचा राजीनामा देणार असून शिंदे भाजप सरकारमध्ये दाखल होणार असल्याचं वृत्त टीव्ही ९ या वृत्तवाहिनीने दिली आहे.
दरम्यान, सुप्रिया सुळे आणि प्रफुल्ल पटेल यांना पक्षाचे कार्याध्यक्ष केल्यानंतर अजित पवार नाराज असल्याच्या चर्चा होत्या. तर ते कधीही भाजपसोबत जाऊ शकतात असं सांगण्यात येत होतं. अजित पवार यांनी मला पक्षाची जबाबदारी द्या, विरोधीपक्षनेते पदावरून मला मुक्त करा असं राष्ट्रवादीच्या बैठकीत सांगितलं होतं. त्यासाठी अजित पवारांनी १ जुलै पर्यंत अल्टीमेटम दिलं होतं. पण पक्षाकडून कोणताही निर्णय घेण्यात आला नसल्यामुळे अजित पवार नाराज असून ते आता फडणवीस सरकारमध्ये सामील होणार आहेत.
अजित पवार यांना राष्ट्रवादीच्या ३० ते ४० आमदारांचा पाठिंबा असून त्यांच्यातील ९ मंत्री शपथ घेणार असल्याची माहिती समोर आली आहे. त्यामुळे सध्याच्या महाराष्ट्राच्या राजकारणातील ही सर्वांत मोठी अपडेट आहे.
