वाशिम : वाशिम जिल्हा परिषदेचे अध्यक्ष, तथा राष्ट्रवादी काँग्रेसचे जिल्हाध्यक्ष चंद्रकांत ठाकरे यांचा एक व्हिडिओ जिल्ह्यात सध्या सोशल मीडियावर चांगलाच चर्चेत आहे. या व्हिडिओत चंद्रकांत ठाकरे ‘मोदी आयो रे’ गाण्यावर डान्स करत आहेत. वाशिम जिल्ह्यातील मंगरुळपिर तालुक्यातील एका होलिकोत्सव कार्यक्रमात त्यांनी ह्या गाण्यावर ठेका धरला.
विशेष म्हणजे या आधीही देवेंद्र फडणवीस हे वाशिम जिल्ह्यात आले असताना त्यांची भेट घेतल्याने चंद्रकांत ठाकरे यांच्या भाजप प्रवेशाच्या चर्चा रंगल्या होत्या.
चंद्रकांत ठाकरे यांच्या नेतृत्वात जिल्हा परिषद निवडणुकीत राष्ट्रवादीने चांगलीच मुसंडी घेतली होती व तब्बल १४ जिल्हा परिषद सदस्य निवडून आणत राष्ट्रवादी सर्वात मोठा पक्ष ठरला होता. काँग्रेस व वंचितसोबत युती करून ठाकरे जिल्हा परिषद अध्यक्ष झाले मात्र नंतर ओबीसी आरक्षणामुळे त्यांचे जिल्हा परिषद सदस्यपद रद्द झाले होते. त्यामुळे अध्यक्षपद त्यांना सोडावे लागले होते.
नंतर पुन्हा झालेल्या पोटनिवडणुकीत ते फारच थोड्या मताने विजयी झाले व पुन्हा जिल्हा परिषद अध्यक्ष झाले. आता भाजपच्या ताब्यात असलेल्या कारंजा-मानोरा विधानसभा मतदार संघातून २०२४ साठी ते इच्छुक आहेत.
