परभणी: बस प्रवासादरम्यान मुलीची छेड काढल्यामुळे एका तरुणाला नागरिकांनी कपडे फाटेपर्यंत मारहाण केली आहे. सदरील घटना परभणीच्या सेलू बस स्थानकामध्ये घडली आहे. याप्रकरणी मुलीची छेड काढणाऱ्या तरुणावर गुन्हा दाखल करण्याची प्रक्रिया सेलू पोलीस ठाण्यामध्ये सुरू आहे. या घटनेमुळे एकच खळबळ झाली आहे.
परभणीच्या सेलू बस स्थानकावरून एम एच २० बी एल ३५०५ क्रमांकाची बस पाथरीकडे जात होती. या बसमध्ये दोन मुली प्रवास करत होत्या. याच बसमधून इम्रान वसीमोद्दीन फारोखी (वय ३४ वर्षे, रा. पाथरी) नावाचा तरुणदेखील प्रवास करत होता. त्याने बसमधील दोन मुलींपैकी एकीची छेड काढली. यामुळे बसमध्ये एकच गोंधळ उडाला. चालक राऊत व वाहक विष्णू कुमकर्ण यांनी सेलू बसस्थानक येथील वाहतूक नियंत्रक वसंत बोराडे यांच्याशी संपर्क साधला. त्यामुळे बस पुन्हा सेलूला आणण्याच्या सूचना देण्यात आल्या. बस सेलू आगारामध्ये परतल्यानंतर याचवेळी सदरील तरुण बसमधून खाली उतरताच तेथील नागरिकांनी तरुणाला बेदम मारहाण केली.
बस स्थानकामध्ये उडाला गोंधळ
बसमध्ये मुलीची छेड काढल्यामुळे बस सेलू बस स्थानकामध्ये आणण्यात आली. यावेळी या ठिकाणी उपस्थित असलेल्या नागरिकांनी छेड काढणाऱ्या तरुणाला लाथाबुक्क्या आणि पट्ट्यांनी मारहाण केली. यामुळे सेलू बस स्थानकामध्ये एकच गोंधळ होता. घटनेची माहिती मिळताच पोलिसांनी घटनास्थळी धाव घेऊन सदरील तरुणाला ताब्यात घेतले त्यामुळे पुढील अनर्थ टळला.
