परभणी : शहरातील मध्यवस्तीतील गुलशनाबाद भागातील नागोबा मंदिराच्या जागेची आज भूमि अभिलेख विभागाच्या अधिकारी, कर्मचा-यांनी पोलीस बंदोबस्तात मोजणी पूर्ण केली. शहरातील यशवंत आयटी कॉलेजच्या बाजूच्या भागातील नागोबा मंदिराच्या नियोजित जागेवर काही अतिक्रमणे झाली होती. त्यामुळे मंदिर समिती व विविध पक्षाच्या नेतेमंडळीचा या अतिक्रमणकर्त्यांबरोबर वाद सुरू होता. अखेर भूमि अभिलेख विभागाच्या मार्फत मोजणी पूर्ण करण्याचा निर्णय घेण्यात आला.
त्याप्रमाणे भूमि अभिलेख विभागाचे अधिकारी, कर्मचारी यांनी पोलीस बंदोबस्तात या मोकळ्या जागेची मोजणी केली. मोजणी केलेल्या जागेवर खुणा करून या ठिकाणी पोल देखील उभारण्यात आले आहेत. यावेळी भारतीय जनता पक्षाचे परभणी विधानसभा प्रमुख आनंद भरोसे, सामाजिक कार्यकर्ते रितेश जैन यांच्यासह पदाधिकारी व कार्यकर्ते उपस्थित होते. तसेच आमदार डॉ.राहुल पाटील यांच्यासह अन्य सहकार्यांनी घटनास्थळी भेट देवून पुढील प्रक्रिया संदर्भात विचार विनिमय करण्यात आला.
