मुंबई: राज्यातील धनगर समाजाचा समावेश अनुसूचित जमातीत करण्याच्या मागणीने जोर धरला असताना राज्य सरकारने अनुसूचित जमातींसाठी राबविण्यात येणाऱ्या योजनांचे लाभ धनगर समाजाला देण्याचा निर्णय बुधवारी राज्य मंत्रिमंडळ बैठकीत घेतला. त्यासाठी मुख्यमंत्र्यांच्या अध्यक्षतेखाली एक शक्तिप्रदत्त समिती नियुक्त करण्याचा निर्णयही मंत्रिमंडळाने घेतला.
मराठा आरक्षणाच्या मागणीने जोर धरला असतानाच धनगर समाजाचा अनुसूचित जमातीच्या प्रवर्गात समावेश करण्याच्या जुन्या मागणीने डोके वर काढले आहे. तत्कालीन मुख्यमंत्री देवेंद्र फडणवीस यांनी धनगर समाजाला अनुसूचित जमातीच्या आरक्षणाचे आश्वासन दिले होते. मात्र, आरक्षणाच्या मागणीवर मात्रा म्हणून आदिवासी समाजासाठी राबविण्यात येणाऱ्या योजना धनगर समाजासाठी लागू करण्याचा निर्णय घेतला होता. आता लोकसभा आणि विधानसभा निवडणुकीच्या तोंडावर पुन्हा हाच निर्णय घेण्यात आला आहे. त्यानुसार धनगर समाजासाठी १३ योजना लागू केल्या जाणार आहेत. उपमुख्यमंत्री तथा तत्कालीन अर्थमंत्र्यांनी आपल्या अर्थसंकल्पी भाषणात धनगर समाजाच्या उन्नतीसाठी निधी उपलब्ध करून देण्याचे त्याचप्रमाणे शक्तिप्रदत्त समिती स्थापन करण्याबाबत आश्वासन होते. त्यानुसार मुख्यमंत्र्यांच्या अध्यक्षतेखाली उपमुख्यमंत्री तथा अर्थमंत्री, इतर मागास बहुजन कल्याणमंत्री, आदिवासी विकासमंत्री, ग्रामविकासमंत्री, पशु दुग्ध आणि मत्स्यव्यवसाय विकासमंत्री, वस्त्रोद्योगमंत्री त्याचप्रमाणे मुख्यमंत्र्यांनी निर्देशित केलेले धनगर आणि तत्सम समाजातील प्रत्येक महसूल विभागातून एक अशासकीय सदस्य या समितीचे सदस्य असेल.
१४० कोटींची तरतूद
आम्हाला ओबीसींतून हटवण्याचे कारस्थान
ज्यांना कायदेशीरदृष्ट्या आरक्षण देता येत नाही, त्यांना ओबीसीमध्ये घेतले जात आहे आणि जे आधीपासूनच ओबीसीमध्ये आहेत त्यांना मात्र ओबीसीतून बाहेर ढकलायचा डाव सुरू आहे. ओबीसींविरोधात असा दुहेरी कार्यक्रम सुरू असल्याचा आरोप भुजबळ यांनी केला. मराठा समाजाला सर्व प्रकारचे आरक्षण हवे आहे. एकाला कुणबी प्रमाणपत्र मिळाले की त्यांच्या नातेवाइकांनाही कुणबी प्रमाणपत्र मिळणार आहे. कुणबी प्रमाणपत्र मिळाले की, त्यांना आरक्षण मिळणार आहे. शैक्षणिक, नोकरी आणि राजकारणात त्यांना आरक्षण मिळणार आहे. यात आमचे म्हणणे इतकेच आहे की, ओबीसीमध्ये आधीच ३७५ जाती असताना आता हे लोक आहेत. अशात मराठा समाजही यात आला, तर कुणालाच काही मिळणार नाही, असे भुजबळ म्हणाले.
